مقالات نورا عبد الفتاح

إتعلم متتفرجش بس

فيه نموذج
من البشر عايزين نتعلم منه كلنا إزاى نحل مشاكلنا ونتخطى الصعاب ونتجاوز الأزمات؛ النموذج ده نموذج فريد؛ من واجبه ومن حقنا إنه يعلمنا السر ورا إنه يعيش مرتاح وسعيد طول الوقت مهما حصل !!😎

النموذج ده بيستخدم أداة واحدة رئيسية بيعتبرها سلاحه الأول؛ وأحياناً الوحيد للفوز دائماً !
ألا وهى؛ التناحة !!!!!!!🤓
آه والله زى ما باقولك كدا !
بيتنح للمشاكل؛ لو حصل له مشكلة بيتنح لها.
طب ازاى ؟
إنه ميعملش أى حاجة !
ولا حتى يحلها ؟
ولا حتى يحلها !
طب بيعمل ايه ؟
بيسيبها كدا، كأنه مش واخد باله. 😂
ربما تخلص أو تزهق هى وتمشى !
وربما حد غيره يحلها !
المهم انه يتنح لها، بمعنى انه يقولها مهما كبرتى ومهما اتعقدتى، أنا مش هاحلك !!

طب لو مطلوب منه شغل أو خدمة أو مساعدة أو مهمة ؟
بيتنح بردو .
ازاى ؟
ميعملهاش ويعمل نفسه من إيطاليا !
يعمل نفسه مش عارف أو مش قادر أو مش فاهم أو يصرح عادى إنه مش عاااايززز !

طب هل هو كدا بيبقى مرتاح وضميره مرتاح ؟
جداااا
مرتاح جدا فوق الخيال !

لكن مش عايزين نخلط بين الناس دول وناس تانية آخر جمال وناس تبهرك وتبقى مستغرب إنتوا كدا ازاى ؟
انتوا حقيقيين ؟
انتوا كدا بجد ولا بتهزروا ؟

الناس دى مين بقى ؟
الناس دول بسم الله الرحمن الرحيم ( الناس الهادية ) آه والله !!
ناس هادية عادى
وبتعيش هادية وبتنفعل بهدوء وبتختلف مع الناس بهدوء وبتاخد الصدمات بهدوء وبتتكلم طول الوقت بهدوء وبتشتغل بهدوء وبتعمل كل حاجة فى الدنيا عادى جداً بس بهدوء!

أنا لما باشوف الناس دول بابقى عايزة أتصور معاهم أو أطلعهم فى التليفزيون أو أبوس إيديهم أو أشكرهم بصوت عالى أو أعمل أى حاجة.

إنت متخيل إنك فى هذا الزمن شايف قدام عينك شخص هادئ وبيتكلم بصوت هادئ ؟
وخلى بالك إن الصوت الهاااادئ غير الصوت الواطى !!

صوت هادئ يعنى صوت مطمئن مرتاح بيفكر قبل ما يتكلم بيتحكم فى غضبه قائد فى نفسه كدا ومسيطر بالسليقة من غير أى مجهود !

الناس الجميلة دى إوعى تظلمهم وتقول عليهم باردين أو تنحين؛ دول حاجة جميلة؛ ما لاعين رأت ولا أذن سمعت فى هذا الزمن. 😂

نرجع مرجوعنا لموضوعنا إياه ونسأل نفسنا
هل هذا الشخص التنح هيعلمنا أسرار القدرات اللى عنده ؟
أبداً
طب ليه ؟
لأنه تنح 🥸
مبيعملش حد حاجة

طب هنتعلم ازاى ؟
تعلم بالملاحظة يا فندم !! هنتفرج عليه !! 🤓
هنفضى نفسنا ونقعد نتفرج عليه وهو بيتنح فى كل المواقف وهو بيرد على الناس بتناحة وبيشتغل بتناحة وبيتنح لوحده كدا فى أوقات الفراغ. 😂
اتفرج واتعلم؛ متتفرجش بس !

وفى نفس الوقت حاول تتعلم من الهادئ؛ وامسك العصاية من النص واقف فى منتصف الطريق بين الهدوء والتناحة؛ متخليش الهدوء يتحول لبرود ولا التناحة تبقى أسلوب حياتك !
كدا تبقى وصلت لمرحلة ال prince وبالتوفيق ! 😉😉

مقالات ذات صلة

اترك رد

زر الذهاب إلى الأعلى
error: يمنع النسخ من هذا الموقع