عزيزى المغرور؛ اللى طول الوقت بتتكلم عن إنجازك فى شغلك وعن شكلك الجميل وعن معلوماتك العامة وعن أخلاقك الحميدة وعن أولادك اللى مافيش زيهم وعن فلوسك المرمية فى كل بنوك العالم وخبراتك اللى مغطية كل المجالات… إوعى تفتكر إن الناس بتصدق كل كلامك.. أبسلوتلى … ولا إنهم بينبهروا بماركة ساعتك أو عربيتك أو جزمتك !
هما بس بيشوفوك عبيط … (بجد والله باكلمك بأمانة) بصوت محمد هنيدى.
هاقولك ليه !
الناس كلها إلا من رحم ربى بيحبوا نفسهم ومعجبين بدماغهم وطريقة تفكيرهم وستايل لبسهم وطريقة صرفهم لفلوسهم وكل واحد فاكر إنه أشطر واحد فى الدنيا وإن أولاده أحسن عيال فى الدنيا وإنه محور أى قعدة وأى لقاء .. حتى لو هو مبيفهمش أى حاجة !
فإنك تيجى لواحد منهم وتفرقع له الفقاعة اللى هو عايش فيها وتقعد تكلمه عن نفسك ومشاريعك ودماغك وفلوسك ولبسك ومعلوماتك، مانصحكش خالص !
لأنه عاجبه فقاعته زى ما انت عاجبك فقاعتك ومبسوط فى فقاعته ومش عايز يخرج منها زى ما انت مبسوط بفقاعتك وعايز تدخل الناس كلها فيها علشان تحس بالرضا.
فهو كل اللى هيحصل من الحبتين بتوعك دول؛ إن الناس هيقولوا عليك أرعن وتافه !
أحياناً بقى تلاقى أسرة أو عيلة بحالها كلها رعناء، العيلة كلها ناس متعنطظين وطالعين فيها، ومتلاقيلهمش مبرر ، يعنى تدور على أى أمارة للغرور ده كله، متلاقيش !
وأحياناً تانية تلاقى ناس قارية مئات الكتب وثرية جداً وعارفين فى الدين كأنهم علماء دين وأخلاقهم فى منتهى التسامى، لكن عمرهم ما بيتكلموا عن نفسهم ولا عن أخلاقهم ولا عن ممتلكاتهم !
عزيزى المغرور؛ إتفرج على الناس دول واتعلم منهم وقلدهم بالظبط، متقرفناش معاك !
وخصوصاً الحتة بتاعة أنا فاهم كل حاجة صح واقدر انصح كل الناس لأنى مريت بكل التجارب الإنسانية والمواقف الحياتية وخبراتى ليس لها حدود، ولدى الحق إنى أتدخل فى حياة أى حد وأخليه لاااازم يسمع كلامى!
بلاش.. بلاش يا عزيزى…
