ملحوظة :
أنا آسفة مقدماً على الكلام اللى هيتقال بعد شوية !
فيه
حاجة جميلة أوى بتحصل لأغلب الناس فى وقت معين من حياتهم؛ إسمها الحب والجواز. ❤️
الجواز ده حاجة كويسة جدا وجميلة جدا جدا فيها مشاركة وذكريات وحب حقيقى مش بتاع الصيع، حب بتاع التفاصيل الصغيرة؛ بتاع الإيثار؛ بتاع الونس؛ بتاع الدعم؛ بتاع الحكايات؛ بتاع العلاقة الجنسية الحلال وفى أى وقت؛ بتاع الخوف على بعض؛ بتاع الدفع لقدام؛ بتاع عشق العيوب؛ بتاع أنا وانت ولا حد تالتنا …. !
هو ده الحب بتاع الجواز السوى اللى لازم أى زوجين بيمروا بفترة ما فى حياتهم مستمتعين بيه !
طولت بقى أو قصرت !
مالناش دعوة !
بس الكلام ده كله بيبقى موجود وبيحصل وبيبقى مكون ذكريات كتيرة جدا وجميلة جدا؛ بتخلى الزوجين يكملوا ولو لفترة !
أحياناً الحاجات الحلوة دى بتزيد فى وقت وبتقل فى وقت تانى !
وأحيانا الحاجات الحلوة دى بتقل بس؛ ومبتزدش خالص !
وبتفضل تقل لحد ما تبقى ذكريات بس وبعد شوية الذكريات بتتنسى وبتبقى الحكاية كلها محايدة؛ ولا حلوة ولا وحشة !
وبعد شوية بتبقى وحشة ! 😢
وبعد شوية كمان بتبقى وحشة أوى. 🥲
وكل ما مر الوقت بتبقى أوحش. 😟
طب ليه نستنى لما الحكاية تمسخ وتبقى وحشة أوى، طب ما نفضها فى الوقت المناسب، لما الدنيا بقت وحشة والطريق بقى one way !
والسؤال اللى محدش بيجاوب عليه :
ليه الناس بتطلق لما يبقوا فى مرحلة منيلة ومفضوحين وضاربين بعض بالشباشب وعيالهم متمرمطين فى المحاكم الساعة 8 الصبح ؟
ليه لما بيلاقوا الدنيا بايظة مبيعرفوش إنهم لازم يبعدوا علشان ميكرهوش بعض وينسوا كل الحاجات الحلوة اللى كانت فى الأول واللى ممكن تكون استمرت سنة أو إتنين أو عشرة أو عشرين ؟
ليه مبيبعدوش قبل ما يوصلوا لمرحلة إن كل واحد مش عايز يسمع إسم التانى ولا يشوفه ؟
ليه مبيعرفوش ياخدوا القرار المناسب فى الوقت المناسب ؟
فى الفترة الأخيرة دخلت فى جروبات كتيرة بتتكلم فى قضايا الأسرة وكلها عن الطلاق والخلع والنفقة والطاعة والحضانة والقايمة. 😣
الجروبات دى فيها بوستات مهما وصفت كمية الغل اللى فيها مش هاديله حقه فى الوصف.
فيها كمية خطط قذرة لتضييع حق الطرف التانى بأى شكل !
هاقولك أمثلة بسيطة :
1- إزاى أعرف إن طليقتى اتجوزت ولا لاء وهل فيه أى إجراء قانونى أؤذيها بيه حتى لو كان إنى أرفع عليها دعوى إنها اتجوزت فى فترة العدة واعملها قلق مع جوزها لحد ما تثبت إنها برا العدة ؟
2- أنا ابنى ضرب مراته وعورها وكان هيموتها وهى راحت عملت محضر وحبسته( هل فيه أى أذى عليا )؟
أصلى كنت واقفة أتفرج عليه وهو بيضربها ومعملتش حاجة أنا واولادى أصل احنا بيت عيلة ؟)
3-أنا عايزة أرفع قضية خلع هل ممكن أبعت إخطارات المحكمة كلها على عنوان أهله علشان يتفضح وأهله يعرفوا إنى خلعته ؟
أنا طليقتى رفعت قضية تمكين بس أنا سبقتها وعملت عقد بيع الشقة لأمى؛ هى ممكن تاخد ضدى إجراء قانونى ؟
أنا عليا متجمد نفقة 28 ألف جنيه؛ ومش عايز أدفع؛ هو كدا أكيد هاتحبس ولا فيه أى إجراء ممكن يأجل شوية كمان ؟
أنا بادى طليقتى نفقة إبنى ((( 500 جنيه))) ومش عاجبها ورافعة عليا قضية نفقة؛ هى ممكن يتحكم لها بكام ؟
أنا رافعة قضية تمكين بس طليقى طردنى وقعد هو وأهله فى الشقة وأنا أهلى فى محافظة بعيدة وأنا شغلى فى القاهرة وماقدرش اقعد مع أهلى؛ حالياً قاعدة فى أوضة البواب أنا وابنى؛ لأن البواب ساب العمارة والسكان مش هيجيبوا بواب غير لما الاقى مكان؛هو الحكم ممكن يبقى بعد قد إيه ؟
أنا رفعت قضية طاعة واتحكم لى؛ بس أنا مسافر دلوقتى؛ ممكن حد من أهلى يستلم مراتى من الحكومة ولا لازم أنا ؟ 😂😂😂😂
إنت متخيل إن الناس دول كانوا متجوزين وعملوا شهر عسل ووقفوا جنب بعض فى مرضهم وخلفوا عيال وكانوا بيسهروا ويخرجوا ويسافروا مع بعض ؟؟؟؟
ليه ممشيوش بدرى شوية ؟
ليه ممشيوش قبل ما يبقى أكبر إهتمامات كل واحد فيهم إنه يكدر التانى ويتعس أوقاته بقدر الإمكان وبكل جهده ؟؟
ليه ممشيوش قبل ما تبقى الذكريات كلها اتمسحت بلا رجعة ومش باقى غير ذكريات المعارك اللى بينهم ؟
ليه ممشيوش وهما لسه قادرين يكلموا بعض باحترام ويضحكوا مع بعض ويتناقشوا فى تفاصيل انفصالهم ومستقبل عيالهم اللى مش هيقف بانفصالهم ؟
ليه ميعتبروش الجواز كان مرحلة وخلصت وهيدخلوا فى مرحلة جديدة يبقوا فيها شركاااااء فى تربية ولادهم، مش بيخنقوا بعض من خلال ولادهم اللى مالهمش دعوة بالموضوع أصلا ؟
ده بقى غير التلوث اللى بييجى فى الدماغ من ناحية جنس معين كله على بعضه؛ الست اللى بتتأذى تدخل تشتم فى الرجالة كلهم والراجل اللى إتأذى يدخل يشتم فى الستات كلهم. 😂
وأغلب الرجالة يدخلوا يشتموا فى بوستات الستات والعكس.
الكومنتات بقى من نوعية:
إنتوا شوية نواشز. 😂
إنتوا شوية مخلوعين. 😂
حسبى الله ونعم الوكيل فيكوا ( رجالة أو ستات )
إتقى الله ربنا ينتقم منك انت وكل راجل معاه فلوس ومبيصرفش على ولاده هى الست هتصرف عليهم لوحدها منين ؟
هتتخلع ويبقى إسمك المخلوع.
وخد الكبيرة بقى. 😂
واحد حاطط بوست مستقل بذاته بينصح الناس فيه ( متتجوزش مطلقة محاكم ) لأنها لو (بنت أصول) مكانتش دخلت محاكم وكانت هتفضل مع جوزها ((((( مهما حصل )))).😂😂
الراجل ده طبعاً خد تشجيع وتصفيق فظيع من الرجالة 😂😂😂وشتايم ودعوة كتير جدا من الستات 😂😂😂
الرجالة طبعا أكدوا على كلامه :
وكلامهم : آه طبعاً بنت الأصول تعيش مع جوزها فى أى ظرف 😂
آه طبعاً، بس فين بنات الأصول اليومين دول ؟
كلامك صح؛ بنت الأصول متدخلش محاكم. 😂
بنت الأصول تفضل فى بيت جوزها لحد ما تموت. 😂😂😂
والستات طبعاً دخلت تقول :
ما هى لو كانت متجوزة راجل كان طلقها وِدى وهى يعنى عايزة تروح تتبهدل فى المحاكم ؟
ما هى علشان بنت أصول مينفعش تعيش مع واحد بيضربها وبيخونها فى بيتها.
حسبى الله ونعم الوكيل فيك عشان بتشوه شكل المطلقة.
ده بقى غير الفتى والتأليف والتحريف. 😂
يعنى مثلا : مرة واحدة عجيبة كدا دخلت تسأل :
يا جماعة أنا رفعت قضية طلاق واتحكملى فيها، أنا كدا اتطلقت ولا لازم طليقى يرمى عليا اليمين ؟ 😂😂😂😂😂😂😂
صدق أو لا تصدق إن البوست كان عليه حوالى 30 تعليق منهم 28 بيقولوا لها :
لاء انتى كدا لسه متجوزاه، لازم يرمى عليكى اليمين بلسانه. 😂
لاء، انتى كدا لسه متجوزة ومينفعش تتجوزى تانى، غير لما يقولك انتى طالق.
لاء، انتى ماتطلقتيش، إحنا كدا مش ماشيين على الشرع صح، انتى لسه متجوزة، الحكم ده مش طلاق. 😂😂😂
تحس إنهم مش هاين عليهم يسيبوها تتهنى بالحكم فبينكدوا عليها. 😂
خصوصاً إنهم شايفين إن مافيش بنت أصول من حقها تتطلق تحت أى ظرف.
هما الناس دول وصلوا للمراحل دى فى وقت قد إيه ؟
وبقوا عاملين كدا إزاى ؟
كارهين الجواز وكارهين ولادهم وكارهين الجنس الآخر بالكامل وكارهين نفسهم وكارهين الحياة !
ويفضل السؤال الملحّ !
ليه ممشيوش قبل ما يوصلوا لكدا ؟؟؟؟
ليه ؟؟؟؟؟؟
