ملحوظة: الكلام اللى هاقوله دلوقتى مفعم بالغرور والخُيلاء والعُجب والفشخرة والعنطظة؛ ولا يصلح لأصحاب القلوب الضعيفة !
من زمان وأنا فاكرة إن واحدة من أهم وسائل التقرب من ربنا ومن الناس؛ إن الواحد يتواضع لدرجة الذل. 😂
بجد والله، لأن ربنا بيؤكد علينا دايماً إننا منسيبش نفوسنا تطغى علينا وتمشينا، فاحنا لازم نكسرها دايماً علشان نبقى احنا اللى بنطغى عليها ومقننين المواضيع كلها !!!!
بس أنا عملت حاجة غبية جداً، بقيت باكسرها قدام ربنا ودى حاجة كويسة ❤️ وباكسرها قدام الناس كمان ودى حاجة وحشة جداً.
لما باكسرها قدام ربنا بتبقى حاجة صح لأن ربنا هيضعنى فى مكانى الصحيح ومش هيذلنى ومش هيحطنى فى وضع المستضعف وهيتعامل معايا بأكتر مما أستحق.
لكن لما باكسرها قدام الناس بتبقى دى أكبر غلطاتى فى المطلق، لأن الناس مش بتبقى زى ربنا وعمرها ما هتبقى !
يبقى أعاملهم زى ما باعامل ربنا ليه ؟ 😂
فيه أوقات باعامل الناس على أساس إنى باعامل ربنا فيهم، وبابقى كويسة مع ناس متستاهلش أى خير، فاللى بيحصل إنهم بيصدقوا نفسهم ويفتكروا نفسهم يستاهلوا. 😂 ومبيبقوش فاهمين يعنى إيه حد بيعامل ربنا فى الناس وإن الأدب ده علشان ربنا مش علشانهم. 😂
المهم إنى وصلت معاهم لمرحلة إنهم مصدقين إنهم يستاهلوا الخير وأنا ماستاهلش. 😂
فأنا عايزة الكلام اللى باقوله دلوقتى أصالح بيه نفسى وأرفعها شوية بدل ما أنا على طول بأنزلها تحت بكل سادية وافتراء. 😂
أول ما بدأت أكتب وفى المقالات الأولى خالص، كتبت 3 مقالات عن عيوبى. 😂
وكتبت فيها عيوبى كلها بمنتهى الوضوح لعلها تكون وسيلة لإصلاحها وفيه حاجات وحشة عندى صلحتها فعلاً بعد المقالات التلاتة دول.
بس أنا المرة دى عايزة أكتب مزايا؛ مزايا بس. 😂
بادئ ذى بدئ أنا من أهم المزايا اللى عندى إنى ( باحس بأى حد وأحط نفسى مكانه ) 😂 متستغربش؛ الناس اللى بيحسوا دلوقتى بقوا قليلين أوى، واللى بيحطوا نفسهم مكان الناس بقوا منعدمين. 😂
ثانياً؛ ( باستمتع ) بمساعدة الآخرين، باستمتع بجد، يعنى مش باساعد الناس وانا مخنوقة وحاسة إنى باريح اللى عنده مشكلة؛ لاء ده أنا اللى بارتاح وباحس بسعاااادة غامرة، ماعرفش ليه ؟! 😂
لما بيبقى فيه حد متضايق من حاجة أو عنده هم معين بابقى نفسى آخد منه الهم ده عندى أنا؛ وباحس إنى مبسوطة إنى باعمل كدا، مع إنه علمياً هو كدا ركّبنى همه وفضى همه عندى أو على الأقل جزء منه، سواء معنوياً أو مادياً.
ثالثاً: معنديش طلبات مادية تقريباً خالص، عندى زهد. 😂
عندى لبس وشنط من أيام الكلية موجودين لحد دلوقتى، ولسه بالبسهم والله. 😂
وتطلعاتى فى الخروج والفسح والدهب والياقوت والفلوس محدودة جداً جداً.
رابعاً: أم مثالية. 😂
من زمان وانا باستمتع بدور الأم وباعتبره وظيفتى الرئيسية فى الحياة، كنت باستمتع بالبص فى وش أولادى وهما أطفال رضع لفترات طويلة قبل ما يبقوا الحاجات الغريبة الموجودة دلوقتى، 😂، كنت باحب ريحة حفاضاتهم، 😂 مش ريحة رقبتهم ووشهم ونفسهم وشعرهم اللى كل الناس بتحبها دى، لاء أنا كنت باحب الحفاضات. 😂
ساعات كان يبقى عندنا ناس وتلاقى حد منهم قالى ( خدى خدى غيرى له ، خدى خدى غيرى لها) وهما قرفانين أوى، بينما أنا بقى كنت باحب اشمهم قبل ما يغيروا، وأنا فعلياً كنت باحس إن ال6 شهور الأولى اللى كانوا لسه مبدأوش ياكلوا أكل خارجى، كان فعلاً ريحتهم حلوة أو أنا شخصياً كنت باحبها. 😂
باحافظ على علاقاتى بشكل مباااالغ فيه رغم إنى ماليش أى منفعة من أى علاقة فى حياتى غير علاقتى بأبويا وأمى. باصبر على أى حاجة من أى حد، ومباقطعش علاقاتى مهما الطرف التانى كان معفن. 😂
باحافظ على وزنى ودى حاجة مش سهلة.😂
باسمع الناس ( كويس )؛ باسمعهم بالشكل اللى يريحهم لحد ما يكونوا طلعوا كل اللى عايزين يقولوه وفى نفس الوقت معنديش تطلع إن حد يسمعنى. 😂 تقريباً أنا هبلة. 😂 عندى شعور دائم إن محدش هيبقى عايز يسمع يبقى بلاش إحراج. 😂
باسيب اللى قدامى يصدق إنه محترم وصادق ويستاهل الاحترام من كتر ما أنا باحترمه؛ بينما أنا عايزة أديله رصاصة فى دماغه وأتفرج عليه وهو روحه بتطلع.😂
باحب أأكل الناس. 😂
باحب أعمل عزومات مع إنى مباكلش أغلب أصناف الأكل اللى باعمله، باحب أعمل للناس قهوة رااائعة مع إنى مباشربش القهوة غير فى الضرورة الملحة لو مش نايمة أو عندنا امتحانات أو ظرف معين.
لما حد بيسيئ ليا بادخل دماغه واتصور الاحتمالات اللى دفعته لكدا واتعامل معاه عادى كأنه معملش حاجة، لأن اللى بيغلطوا فى حق الناس دول بيصعبوا عليا، كفاية عقاب ربنا ليهم، هيروحوا منه فين ؟ 😂
ونضيف على كدا إنى باحب النظافة والالتزام والنظام وكل ما آخره ألف وميم.
أنا شايفة إن كفاية خُيلاء كدا النهاردة لحد ما افتكر شوية مزايا تانية علشان اعمل 3 مقالات عن المزايا زى ما عملت 3 عن العيوب.
سلام عليكم. 😎
إنت كمان إكتب مزاياك وعيوبك وقيم نفسك بموضوعية، بس إكتب مزاياك الأول مش عيوبك زى ما أنا عملت مع نفسى. 😉❤️
