فى مقال سابق كان اسمه؛ بطل نكد … بطل جبن، كنت باتكلم فيه عن صعوبة برمجة العقل وإن الصعوبة دى هى اللى بتسبب أغلب الأمراض النفسية، واتكلمنا عن إن صعوبة برمجة العقل هى اللى بتخلى العلاج النفسى بيطول جدا وأحيانا مبيتمش أصلا، من كتر ما الأفكار الغلط ثابتة فى العقل ومتبتة، لأنها هى اللى بتكونه وهو بيحاول دايما يحافظ على تكوينه اللى هو أفكاره.
فيه ناس بقى، اللى هنتكلم عنهم المرة دى، عكس كدا خالص، يعنى برمجة عقلهم مافيش أسهل منها، يعنى ممكن تبرمج عقله بكلمتين، ممكن تبرمجه ب can بيبسي ب 6 جنيه، ممكن تبرمجه ببصة، بمكالمة تليفون.
ممكن يشيل كل الأفكار اللى كانت فى دماغه ويفضيها فى أى صندوق زبالة كأنها مكانتش موجودة، ويملى دماغه بأى حاجة بمنتهى السرعة، عنده مرونة تخوف.
معندوش ثوابت تقريبا خالص، كل اللى بيدخل دماغه ممكن يخرج بمنتهى السهولة والسرعة ويتبدل بأفكار جديدة نوفى وعلى مزاج اللى قدامه.
متفهملوش حاجة أبداً، لأنه طول الوقت تايه فى الأفكار اللى عمالة تدخل وتخرج من دماغه من غير أى ضابط.
الدكتور أحمد خالد توفيق الله يرحمه كان له مقولة جميلة جداً بتقول ” إن عقلك في العقد الثاني والثالث من حياتك يكون أشبه بمقلاة رخيصة يلتصق بها الطعام، أما بعد سن الثلاثين فعقلك مقلاة فاخرة لا يلتصق بها أي شيء “.
لكن دول بقى بيفضل عقلهم زى المقلاة الرخيصة لحد ما ربنا ياخدهم عنده، مهما بلغوا من العمر.
الناس دول بقى تطمن عليهم خالص من الناحية النفسية، يعنى عمرهم ما يجيلهم أمراض نفسية أبدا، هما بس بيجيبوا أمراض نفسية لبعض اللى بيتعاملوا معاهم، لأن التعامل معاهم بيبقى صعب ومرهق جداً.
هما أصلا لو جاتلهم فكرة إنهم مرضى بالليل ( وده نتيجة إن حد قالهم إنتوا مرضى )، لما هيصحوا الصبح وحد يقولهم لاء إنت كويس، عقله بياخد جملة انت كويس ويصدقها فى ثانية ويبنى عليها أفكار من نفس النوع، ويخف، وينتهى الأمر.
عندهم مناعة نفسية لا حدود لها، بيعرفوا يغلبوا الشر اللى جواهم لو حبوا فى ثانية واحدة، وفى ثانية واحدة بردو بيغلبوا الخير اللى جواهم واللى جوا أى حد فى الدنيا لو حبوا !!
عندهم طاقة كبيرة جداً، ممكن يستعملوها فى حاجة مفيدة أو منفعة وممكن يستعملوها فى حاجة تافهة جدا ولا تسوى قرش، ويقضوا فيها وقت ويدفعوا فلوس كتير ويبذلوا مجهود.
الناس دول ميعرفوش حاجة إسمها وضوح، يعنى لازم يلفوا ويدوروا ويعملوا حوارات وأفلام حتى على أبسط المواقف.
بيشعوا توتر طول الوقت على كل اللى حواليهم، ويا ريت منخلطش بين التوتر والقلق، لأن دول مبيبقاش عندهم قلق خالص، اللى عندهم بيبقى توتر.
تصرفاتهم مش مفهومة معظم الوقت، يعنى متبقاش عارف هو مبسوط منك ولا زعلان، هو معاك ولا ضدك، هو بيحبك ولا بيكرهك، هو مرحب بوجودك ولا عايزك تخفى من قدامه، فى الغالب هو نفسه مش فاهم نفسه، إنت هتفهمه ؟
آه والله، ممكن تلاقى واحد من الناس دول مش فاهم نفسه؛ ولا فاهم هو عمل ليه كدا فى الموقف الفلانى أو هو ليه متمسك بكذا أو ليه تخلى عن كذا، أو ليه اشترى كذا، والله ما بيبقى عارف، وتسأله ليه عملت كذا أو ليه قلت كذا، يقولك ماعرفش، وبيبقى فعلاً مش عارف، والعجيب إنه ممكن فى لحظة ما يعرف إن مافيش مبرر للموقف ( س ) مثلا، يقلب فى ساعتها وياخد الموقف ( ص ) اللى هو ممكن يبقى عكسه تماماً، واللى بردو ممكن مايكونش عارف هو هياخده ليه !
الناس دى كمان لازم تخلى بالك من حاجة مهمة جدا وانت بتتعامل معاهم، إنك متاخدش منهم أى وعد، لأنه هيخرج من دماغهم فى أقرب فرصة، ممكن بعد دقايق بينما ميعاد الوعد ده بعد أيام أو شهر أو شهور، فتلاقى الوعود بتتنقح أو بتتغير أو بتتلغى أو بتتنسى فى زحمة الأفكار اللى مبتبطلش دخول وخروج.
الناس دى بتبقى مرهِقة جدا للى حواليها بكسر الهاء، ومرهَقة جداً بفتح الهاء، وبيبقوا دايماً شكلهم تعبان ومستهلَك، وفى الغالب صوتهم عالى ومعندهمش أى قدر من الهدوء ولا السكون، يعنى بيبقى عندهم نشاط حركى زائد وفَرْك كتير.
الناس دول فى الغالب بيبقوا أنانيين جداً ومبيفكروش غير إنهم إزاى يظبطوا دماغهم فى الوضع اللى هيريحهم، فيخرجوا كل اللى هيضايقهم حتى لو مهم جدا لحد تانى، ويملوا دماغهم بما ينفعهم هما بس فى الدقايق أو الساعات اللى جايين، حتى لو هيضر حد تانى أو حتى لو هيضرهم هما فى الساعات البعيدة، المهم دلوقتى أو المستقبل القريب جدا، وبعد كدا يبقوا يبدلوا براحتهم لو طرأ طارئ.
وطبعاً بيبقى عندهم وشوش بعدد المواقف؛ وش المتدين ووش الصايع، وش المتقن للعمل ووش اللى بيقلب أى حاجة علشان تخلص وخلاص، وش الأنانى ووش اللى بيراعى الناس، وتغيير الوشوش ده بيعملوه بمنتهى السهولة والسرعة.
كان نفسى نستفيد منهم ونعرف بيبرمجوا عقلهم بالسرعة دى ازاى، وازاى الناس بتبرمجهم بالسرعة دى بردو !
بس للأسف طلع مافيش أى آلية معينة أو خطوات أو خطط بعينها، ينفع يقولوها للناس اللى مبتعرفش تغير برمجتها زى المرضى النفسيين مثلا أو زى اللى عندهم أى عادات محتاجين يغيروها، لأنهم بيعملوا كدا تلقائياً، دون مجهود، يعنى عقلهم اللى بيعمل كدا وهما نفسهم مش فاهمين ازاى !!!
