مرة وانا واقفة مع بنتى فى الشارع شافت محل بيبيع الهدوم بالوزن،قالت لى ايه ده الحقى محل كاتب على الفاترينة سعر كيلو ملابس أطفال، قلت لها آه فيه محلات بتعمل كدا فعلا، قالت لى يا سلاااام ؟
كنا واقفين فى مكان مستنيين فيه حد واتأخر، واحنا واقفين هى فتحت تليفونها لقت إعلانات عن أماكن بيع الملابس بالوزن القريبة من المكان اللى احنا كنا واقفين فيه ولاقت كمان بوستات بتقول ( هل تعلم أن هناك ملابس تباع بالوزن ؟) ( ما هى إيجابيات شراء الملابس بالوزن ؟).
( دول بيعرفوها المعلومة اللى متعرفهاش وبيعرفوها الأماكن وبيقنعوها بالمزايا )!
مرة تانية ورتنى صورة فستان سواريه وقالتلى أنا عايزة أعمله، من التصميم والخامة قلت لها ( بس ده كدا بيبين أماكن الملابس الداخلية).
واحنا فى ساعتها وهى لسه بتدور على فساتين طلعت لنا إعلانات ملابس داخلية تصلح للفساتين السواريه.
مرة تالتة حطيت ايلاينر ( ماكياج عيون ) بس نوعه غريب وأنا لو حطيت أى منتجات تجميل مجهولة الهوية، بيحصل لى هبل سريع جدا فى وشى كله وخصوصاً الحاجات اللى جنب العين، أول ما حطيت الايلاينر الغريب ده، عينى اشتغلت فى الهبل وفضلت اهرش فيها لحد ما قطعتها وفضلت هرشانى طول اليوم، سألونى انتى عينك عاملة كدا ليه ؟
قلت لهم ( من ايلاينر معفن كدا لاقيته جوا ) وقعدت لمدة دقيقة وفتحت التليفون لاقيت اعلانات عن ( ايلاينر للعيون الحساسة ).
والأمثلة كتيييييييرة وبتحصل مع كل الناس فى العالم كله.
قلت إيه الناس الجميلة دى اللى بيدوروا على مصلحتنا على طول ومركزين معانا ( من أجل مصلحتنا ) ؟
إختبرتهم إختبار كدا وبقالى لحد دلوقتى 6 أيام كل شوية أمسك التليفون وأقول أنا حزينة، أنا حاسة بالوحدة، أنا زعلانة، انا عايزة حد أتكلم معاه، أنا متضايقة، وقاعدة مستنية إنى ألاقى بوستات بتواسينى ولا بتقترح عليا أكلات تبسطنى شوية ولا أى نصايح من دى، ولحد دلوقتى قاعدة مستنية الدعم النفسى ومحدش عبرنى !
هما مش بيقولوا إنهم بيساعدونا وعايزين مصلحتنا ؟
فشلوا فى الاختبار !
وقبلها بفترة فضلت كذا يوم أمسك التليفون وأقول أنا عايزة اشتغل، أنا بادور على شغل، أنا عايزة وظيفة، أنا أبحث عن عمل، أريد أن أعمل فى الترجمة، أريد أن أعمل كمترجمة من وإلى اللغة الألمانية، وفضلت مستنية بوستات الشغل والوظائف والترجمة، ملاقتش ولا واحد وحيد حتى !
فشلوا فى الاختبار للمرة التانية !
هما مش بيقولوا إنهم بيساعدونا وعايزين مصلحتنا ؟
شكلهم بيساعدونا وعايزين (مصلحتهم ) !
