لفترة طويلة جداً ولحد وقت قريب
كنت باشوف إن الستات فى العموم أهم من الرجالة بصراحة 🫣🫢
وكنت باشوف إن الرجالة الحاجة الوحيدة اللى بتميزهم عن الستات هى إنهم بيشتغلوا أكتر لأنهم مش مطالبين بحاجة غير الشغل لكن الستات مطالبة بالشغل لو كانت بتشتغل وبالبيت والاولاد + إنها لازم تخلى بالها من شكلها مش زى الراجل !
فشئ طبيعى إنها هتيجى على حاجة من التلاتة يا هتيجى على شغلها وتهتم ببيتها وبنفسها ؛ يا هتيجى على بيتها وتظبط شغلها وتخلى بالها من نفسها؛ يا تخلى بالها من بيتها وشغلها وتهمل نفسها وشكلها وصحتها يا تهمل كل دول ومتهتمش بحاجة ! 😂
وبعد كدا أقنعت نفسى إن حتى الميزة دى الرجالة مش بيتميزوا بيها لوحدهم لأن لو الست تفرغت لشغلها هتنتج فيه أكتر من الراجل !
كمان كنت شايفة إن الست هى اللى ممكن تنجح الجواز وهى اللى ممكن تفشله وهى اللى تقدر تنجح أى علاقة وهى بس اللى تقدر تهدها !
هى اللى ممكن تخلى الجو العام مرح وهى اللى تقدر تخليه نكد وغم !
لكن اكتشفت بردو من وقت قريب حاجة غريبة جدا ومفاجأة بالنسبة لى !!!!
الست ممكن تعمل كل ده فعلاً وأكتر من كدا كمان !
بس هل هى بتكون سعيدة وهى كدا ؟
هل بتكون مرتااااحة وهى بتعمل كل الأدوار اللى مش بتاعتها واللى هى نفسها عارفة إنها مش قدها ؟
هل بتقدر تكمل بقية عمرها كدا ؟
الإجابة : لاء طبعاً
والكلام هنا عن الستات الطبيعية السوية !
يعنى مثلاً خيّر واحدة ست من دول بين شغلها خصوصاً لو كان شغل فيه ضغط بدنى ونفسى ومسئولية بيتها وأولادها وبين إنها تلاقى حد يدلعها ويقعدها فى البيت ويصرف عليها كويس ويبقى مسئووووول عنها وتعيش فى بيتها مع أولادها وتدلع نفسها وتهتم بشكلها وصحتها وتدلع البيت كله ! !!!
طبعاً هتختار إنها ترتاح !
وخد دى بقى
إكتشفت كمان إن العلاقات اللى بين الراجل والست عموما والجواز خصوصاً؛ بتستقيم باستقامة الراجل وبتعوج باعوجاج الراجل !
يعنى الراجل هو اللى بينجح الجواز أو هو اللى بيفشله ؟ 😳
نعم بكل تأكيد !
الست المحترمة الناجحة المتدينة المستقيمة متقدرش تنجح جواز مع راجل بعيد عن الدين أو مش مستقيم أو منحرف، مهما حاولت !!
لكن الراجل لو مستقيم ومحترم يقدر ينجح الجواز ويظبط مراته ويظبط حياتهم وبمنتهى السهولة وهو حاطط رجل على رجل !
قدرات بقى من عند ربنا !
مش موجودة عند الست !
فلما الست بتعملها بتعملها بمجهود مضنى لأنها بتتطلب حاجات مش عند الست أصلاً !
الراجل بيعملها زى بطل السباحة اللى بيدخل كل البطولات وبيحقق مراكز والست بتبقى زى اللى لسه بيتعلم السباحة !!
عمرها ما هتحصّله ولو حصّلته هتكون واصلة متأخرة ومجهدة ده إذا مغرقتش !
كانوا بيقولوا لنا الست هى عامود البيت وهى اللى بتمشّى البيت وهى المسئولة عن البيت وهى اللى بتربى وهى اللى بتنجح الحياة والكلام ده بيقولوه من زماااان وكانوا بيقولوا بصوا للستات زمان والبيوت زمان هتلاقيها مسنودة على الست !
لكن الحقيقة إن الست هى عامود البيت لكن هيبقى عامود مهزوز وضعيف لو ماتسندش على الراجل والست هى اللى بتمشى البيت لكن بتوجيهات الراجل والست هى المسئولة عن البيت لكن بمشاركة الراجل والست هى اللى بتربى لكن بتحتاج فى الزنقة تخوّف بالراجل والست هى اللى بتنجح الحياة لكن لو الراجل عايز ينجحها !!
عمرها ما هتنجحها والراجل بيهد قصادها اللى هى بتعمله بأنانيته وخيانته وكذبه ودلعه وفشله فى حياته وبعده عن الدين وتعاطيه مخدرات وعلاقاته القذرة مع طوب الأرض …. !
الست عمرها ما هتقدر تظبطه ولو ظبطته هيبقى ظاهرياً بس … لكن حقيقته لازم تبان من وقت للتانى!
وحتى لو عافرت فترة؛ هتيجى فى وقت كدا مش مناسب خالص لأى حد من أفراد الأسرة وتقول : أنا كدا شكرا جداً، سلام عليكم!!! 😂
لكن عارف بقى لو زوجه أنانية وكدابة ومتدلعة وفاشلة وبعيدة عن الدين ممكن الزوج يظبطها بجد من جواها ومن براها ويعمل منها إنسانة سوية وينجح بيته !
بس ده إذا متدخلش فى الموضوع أهله وأهلها والصحاب والجيران والقرايب والنمل والناموس والناس اللى ماشية فى الشارع !!!
مين أول إنسان قال إن الست أهم من الراجل وإن البيت بيمشى بوجود الست ؟
مين ؟؟؟
البيت ده عامل زى مصنع له مالك ومدير…. المالك هو الراجل والمدير هو الست !
ينفع نقول المدير هو اللى بيمشى الشغل وكدا المالك يركن ويريح ؟
طبعاً لاء
ينفع نقول للمدير نجح المصنع والمالك مش بيمول المصنع ومش بيتابع الشغل ومش بيحل مشاكل المصنع مع المدير ؟
طبعا لاء
ينفع المالك يقول للمدير أنا هاديك فلوس بس ؛وماليش دعوة وانت اللى عليك تنجح المصنع وتطلع إنتاج جيد ومكسب كبير آخر كل سنة ؟
ومتوجعش دماغى بأى عقبات أو مشاكل أنا أصلى مشغول بنفسى وكمان مش بافهم فى الشغل ؟
طبعاً لاء !
يا ناس بطلوا تقولوا إن البيت قائم على الست !
الكلام ده هو اللى خرب بيوت كتير ولا يزال يخرب وهيخرب !
وأغلب الرجالة عجبهم الكلام وقالوا أحسن خليها تشيل وأنا أبقى ماليش دعوة بلا وجع دماغ ويلا نقول معاهم الست أهم ونطلع إحنا من الحوار ده خالص وكدا كدا لما البيت بيخرب بنقول الست هى اللى قصرت، الراجل مبيعيبوش أى حاجة خالص ! 😂
عزيزى الرجل إليك الحل :
كل يوم تصحى الصبح تبص فى المراية وتقول زى ما سارتر كان بيقول ( أنا أشكّ … إذاً أنا موجود )!
لكن إنت تقول : ( أنا رجل … إذاً أنا مهم ) ومرة كمان قبل ما تنام هتلاقى نفسك بقيت كويس جداً وزى الفل. 😂
كان فيه مقولة بتقول : الرجل هو جذع الشجرة، وساقها، وأوراقها، أما المرأة فهي ثمارها.
عايز إيه تانى أكتر من كدا يا عزيزى الرجل ؟ 😂
وطبعاً إحنا مش محتاجين نقول إننا منقدرش نعمم الكلام ده على كل البيوت لأن فيه رجالة فاهمين ومسئولين وناجحين وشاطرين وعارفين رايحين فين وجايين منين وربنا يكثر منهم ويصلح كل البيوت. ❤️
