ساعات كنت باسأل بنتى معندكيش حاجة أكتب عنها وتبقى مهمة ؟
عمرها ما قالت لى غير جملة واحدة وهى فطسانة من الضحك؛ شاهد قبل الحذف، إكتبى أى حاجة واكتبى العنوان شاهد قبل الحذف هههههه.
الحاجات المريبة والمتعلقة بالأسرار أو الفضايح أو الهرى بتبقى فعلاً نشيطة جداً ومطلوبة.
الفيديو بتاع المدرسييييين مثلاً اللى بيرقصوا مع بعض، أيوه طبعا هما مدرسين مش مدرسة، أومال الرجالة اللى كانوا بيرقصوا معاها دول إيه ؟ لكن إحنا سميناه فيديو المدرسة وعملنا فيلم على المدرسة.
لكن الرجالة اللى كانوا بيرقصوا مع زميلتهم، مراتاتهم معملوش مشاكل ليه زى ما الناس قالوا إن جوز المدرسة عايز يطلقها أو طلقها فعلا، والله ما اعرف ولا حبيت أعرف ومشوفتش الفيديو غير النهاردة علشان أعرف أكتب على بينة.
المهم؛ أنا مش محتاجة أقول إنى مش بادافع عن ست بترقص قدام الناس، أنا بادافع عن حاجات المفروض تكون ألف باء أخلاق وإنسانية مش موجودة عند معظمنا.
الفيديو اللى شفته النهاردة بقى له أسبوعين وعليه 2 مليون و100 ألف مشاهدة !
فيه أكتر من 2 مليون بنى آدم دوروا عليه وشافوه فى 14 يوم بس !
بلاش دى.
الست دى حواليها ناس قد إيه ؟
طب هما كانوا واقفين بيتفرجوا عليها ولا غاضين أبصارهم، يعنى الست دى لو كانت وقفت ترقص فى وسطهم فراحوا سايبينها وماشيين، كانت هتكمل رقص ؟؟
بلاش دى.
الشخص اللى صورها ونزل الفيديو ونشره بالشكل ده ومحدش جاب سيرته ولا قال رأيه فى أخلاقه زى ما كلنا بنقول رأينا فى أخلاق الست اللى بترقص، مرتاح دلوقتى وبينام كويس وعايش عادى ؟
طب هو كان فيه إيه فى دماغه لما قرر يعاقب واحدة ست بترقص، بإنه يصورها فيديو وينشره بالشكل اللى حصل ده ؟
وإن كنت أشك إن الحركة دى حركة واحدة ست والله أعلم.
طب هو كان موجود ليه فى مكان مليان بالمنكرات دى أصلا وكمان بيصورها ؟
فى نفس الصدد الشيق جدا ده؛
كان فيه واحدة كدا بتعمل فيديوهات على الفيسبوك، شفت لها فيديو مرة أول ما الكورونا ظهر، كانت بتقول فيه إن الكورونا ده فيلم والماسونية العالمية بتلعب بالعالم كله وبتخوف الناس ولازم مننساقش للكلام ده ومنخافش ونعيش عادى ونشتغل عادى، قالت الكلام ده فى الوقت اللى كان الناس كلها خايفة فيه ومش عارفين إيه اللى هيحصل ومصدقين كل كلام وكالات الأنباء العالمية، وانا لأنى كنت شايفة الموضوع زى ما هى شايفاه كدا بالظبط، الست عجبتنى جدا وقلت عليها بتفهم.
ومن كام شهر كدا لقيت الست دى بتبان عندى فى فيديوهات وهى لابسة ملابس نوم، وبتقول كلام غريب جدا، فقلت دى اتجننت أو ماعرفش جرى لها إيه، فدخلت الصفحة ألغى المتابعة لاقيت إنى مش متابعاها أصلا، دورت على حساب الست دى ملاقتوش، ناديت بنتى قلت لها دورى على إسم الست دى وطلعى الحساب بتاعها وإلغى المتابعة، قعدت تدور شوية وبعدين قالتلى حسابها مش موجود تلاقيه اتقفل.
الست دى حسابها فى الوقت ده تقريبا كان مقفول بس صفحات تانية كانت بتنزل فيديوهاتها وبتتاجر بيها، والفيديوهات دى بتبان عند الناس اللى مش بتتابع الصفحات دى بالعافية كدا، فى الغالب لأن الصفحات دى بتعمل لنفسها إعلانات أو بتدفع فلوس لنشر البوستات بتاعتهم.
فيه فيديو من بتوع الست دى كان منشور من 3 أيام وعليه 3 مليون مشاهدة تقريباً، 3 مليون دول 3000 شخص مضروبين فى ألف، متخيل العدد ؟
،فتحت التعليقات لاقيت أغلبها شتايم فى الست، ماعرفش هما ليه كلفوا خاطرهم وشافوه مادام هى وحشة ومش عاجباهم ؟
هل ال 3 مليون اللى فتحوه ناقمين على الست علشان كدا فتحوا يتفرجوا عليها وهى باين من الفيديو إن لبسها مش مناسب؟
الست دى لو عملت محتوى بملابس النوم فلقت المشاهدات 3 مليون، هتبطل ؟
بلاش دى.
طب لو عملت محتوى بملابس النوم ولقت المشاهدات 4 مشاهدات أو 5 هتكمل ؟
إحنا اللى بنعمل الناس اللى بترقص فى الشارع وقدام زمايلهم وإحنا اللى بنعمل الستات اللى بتعمل فيديوهات تتعمد تفتن بيها الناس، أومال مين اللى بيتابعهم ويتفرج عليهم، مش احنا ؟
وإحنا اللى بننشط تجارة المخدرات بأنواعها، أومال مين اللى بيتعاطى، مش احنا ؟
يعنى تجار المخدرات دول لو حاولوا يبيعوا الكميات اللى عندهم، محدش اشتراها وسوقهم نام وخسروا فلوسهم، هيفضلوا يبيعوا ؟
إحنا بردو اللى بننشط الدعارة، أومال مين اللى بيزنى، مش احنا ؟
يعنى اللى بيزنى ده بيزنى مع مين مش مع ناس تانية مننا ؟
ساعات كتيييير جدا بأحاول أتصور إزاى ربنا شايف مننا كل اللى بنعمله ده وسايبنا ومش بينتقم مننا ليل ونهار.
ربنا خلقنا وخيرنا بين الصح والغلط وقالنا إنه هيحاسبنا، فى الآخر ومقالناش حاسبوا بعض واحكموا على بعض وافضحوا بعض.
اللى عايز يفضح نفسه أو يقلع أو يبيع مخدرات براحته، هو اللى هيتحاسب.
لكن إحنا فى الغالب بنحاسب بعض ومبنحاسبش نفسنا وكتير مننا بينسى إن ربنا هيحاسبه.
ربنا مبينامش ومبيفوتش حاجة وهيحاسب الست اللى بترقص قدام الناس وبردو هيحاسب الناس اللى كانوا قاعدين يتفرجوا عليها وهيحاسب الناس اللى فتحوا الفيديو وعارفين ان فيه ست بترقص وهيحاسب اللى نشر الفيديو بالشكل ده وتعمد يؤذيها بشكل لا يتناسب مع غلطتها.
وهيحاسب الست اللى بتعمل فيديوهات مش محترمة، لكن بردو هيحاسب الناس اللى اتفرجوا على الفيديوهات دى واللى نشروها واللى شتموها فى الكومنتات.
آه هيحاسب اللى شتموها، ربنا قالنا ننأى بنفسنا عن المنكرات أو نحاول نقومها بالحسنى، لكن مقالناش اللى يغلط إشتموه بأهله وأخلاقه ودينه.
وهيحاسب اللى اغتابوا ونمّوا على النماذج دى واللى زيها.
آه، هيحاسبهم لأنهم نَمّوا فى شخص أيام وليالى وبعتوا الفيديوهات لبعض وشتموا فيها ودعوا عليها، ربنا مقالناش اللى يغلط نمّوا عليه وكلوا لحمه حى.
هيحاسب تاجر المخدرات لكن كمان هيحاسب اللى بيتعاطى المخدرات.
ربنا هيحاسبنا كلنا؛ اللى غلطاته بتبان زى الناس دول، واللى غلطاته لسه مبانتش بس مسيرها هتبان.
(بس إحنا بننسى !
