عمرك فكرت فى نفسك من براك خالص كأنك حد تانى بموضوعية وحيادية ونزاهة وقلت لنفسك أنا كنت السبب الحقيقى فى إن كذا يضيع منى أو إنى أفقد حد كان مهم أو إنى ضيعت فرصة مش هتتكرر أو إنى خدت حاجة مش من حقى ؟
عمرك تمردت على نفسك وحسيت بالغضب من نفسك والسخط عليها ؟
عمرك إعترفت لنفسك بإنك متستاهلش جوازة أحسن من كدا أو متستاهلش وظيفة أحسن من كدا أو متستحقش إحترام أكتر من كدا ؟
وتبقى عارف كويس إنت ليه متستاهلش أفضل من اللى انت فيه ؟
وبالتالى تبدأ ترضى بحالك وتعترف إنه مناسب ليك وإنك مش مظلوم ومش مقهور وواخد حقك على قدك وعلى قد اللى بتديه وعلى قد اللى بتعمله وعلى قد مجهودك ؟
وتربى نفسك وتروضها إنها توصل لنقطة الراحة مهما كان حالك ؟
الكلام ده صعب جداااا وتقريباً محدش بيعمله، أنا شخصياً ماعرفش حد بيعمله ومسمعتش عن حد بيعمله، وأنا عن نفسى لو حاولت أعمله مباوصلش لنقطة الراحة اللى بنقول عليها !
الكلام ده صعب بس لو حد عمله، هيوصل لمستوى من السلام الداخلى محدش وصلها من أيام الصحابة والخلفاء الراشدين !
محدش بيوصله لأنه علشان يوصله هيمر بصراعات كتير جدا جدا مع الناس ومع نفسه؛ هينهزم فى معظمها بس بدل ما يروح فى طريق الغضب والتمرد؛ هيقرر يمشى فى طريق التسليم والرضا؛ بس لازم يكون مر بالصراعات الكتير جداً دى قبل التسليم، علشان ميبقاش تخاذل واستسلام !!!
ولازم يطلع من الصراعات دى محتفظ ببعض طاقته علشان يقدر يكمل.
ولازم تكون عنده طاقة للصراعات دى أصلا، لأن الصراعات دى محتاجة مؤهلات قوية جداً !
الصراعات مع الناس دى معروفة ومفهومة !
لكن تعرف يعنى إيه صراع مع نفسك ؟
يعنى تكون زعلان من حد وفرصة الإصلاح غالباً عدت، وإنت والحد ده قريبين من بعض وملازمين لبعض وانت مش عارف تروح منه فين ؟
لأنه بياكل معاك وينام معاك ويروح الشغل معاك ويتخانق معاك ويزعلك وتزعله ومبتوصلوش لحاجة، والحد ده هو إنت بردو ! 😏
وفى نفس الوقت إنت المفروض تعيش كويس وتنام كويس وتشتغل كويس وتكون علاقات صحية وناجحة وانت أصلا المعركة دى واخدة الكثير والكثير من وقتك وطاقتك !
وخلى بالك إن فيه إحتمال كبير جداً إن نقطة الراحة متجيش أو تتأخر جداً !
وعلى قد ما الكلام ده صعب وصعب جداً كمان وكلنا بنهرب منه؛ لكنه ضرورة ملحة لأى شخص سوى؛ علاقته بالناس وبنفسه سوية !
جرب كدا؛ يمكن تلعب معاك وتكسب وتوصل للنقطة اللى محدش وصلها؛ الرااااحة !!!
