فيه
شخصية اسمها شخصية سيكوباتية وفيه شخصية اسمها شخصية سادية وفيه الشخصية الحدية وفيه الهيستيرية وفيه الاعتمادية وفيهالنرجسية … كلهم اضطرابات نفسية ( مش أمراض نفسية ) ده دول هما اللى بيجيبوا للى حواليهم امراض نفسية. 😂
الشخصيات دى كلها لها تعريفات وسمات ووصف شبه دقيق؛ بيعرفنا أصحاب كل شخصية بسهولة، لكن فيه شخصية دورت كتير علىتعريف علمى لها أو وصف لسلوكها ملقتش… وبحثت عنها بحثاً مطولا؛ ملقتش بردو ! 😂
إنها الشخصية ( اللى مبتحسش ) معدومة الحس وال sense 😂
أنا قرأت كتب علم نفس كتيييير جدا وعمرى ما قابلتنى هذه الشخصية المعفنة الفريدة؛ هى فعلاً فريدة؛ لأن لو عدد أصحابها كانوا كتيركانوا خضعوا للدراسة وكان زمانا فهمناهم. 😅
مرة قعدت على جوجل ابحث مخصوص عن هذه الشخصية واكتب سمات الشخصية معدومة الاحساس.. الشخص العديم الحس .. الشخصية عديمة الشعور … الشخص المعدوم الاحساس.
مجاليش أى نتايج بحث ولا طلعت بأى معلومة مفيدة.
هذا النوع من الشخصيات مالهوش وصف معين؛ العلم مقدرش يعرفه. 😅
بس ممكن احنا هنا مع ( بعضشينا )كدا نحكى عنه شوية.
مستمع سئ جدا؛ مبيسمعش رأى حد ولا نقد حد ولا شكوى ولا معلومة ولا بيفتح ودانه لأى حد فى المطلق؛ بيخاف لاحسن يتأثر ولا حاجةوالعياذ بالله. 😂
بينسى كل المواقف اللى مفروض تأثر فيه أو يتعلم منها؛ هى لازم بتكون مواقف مسببة لمشاعر قوية؛ تعلم فى الشخص ومينسهاش؛ لكن هومعندوش الكلام ده؛ معندوش ولا مشاعر ولا قوية.😅
مبيحسش بغلطه؛ مبيحسش لو كسر خاطر حد؛ مبيحسش بالتقصير مهما بدر منه تقصير.
معندوش ضمير ولا أى نوع من أنواع مراجعة النفس ولا عنده استعداد انه حد يراجعه فى غلطه.
فى الغالب كسول جداً ونشاطه ضعيف وانتاجه قليل واعذاره كتير.
عنده قدر عظيم من التناحة والبرود واللامبالاة.
مشاعره كلها كدابة وغير حقيقية؛ هو فى العموم مبيحسش بأى مشاعر أصلاً؛ فلما بتصدر منه مشاعر بتكون غير صادقة وبالتالى غيرمريحة للى حواليه.
عنده كِبر فظيع بيبقى عارف انه غلطان ويقلب الترابيزة ويخليك انت اللى غلطان ويصدق انك غلطان ويخليك تصدق انك غلطان. 😂
بيدوس على كل الناس بالجزمة ومعندوش أى حد عزيز أو قريب أو مهم أو ميقدرش يعيش من غيره.
مرة سألت واحد من هذه النوعية ( مين أهم حد فى حياتك فى المطلق، بتحبه أوى ومتقدرش تستغنى عنه ومهم أوى بالنسبة لك حتى لو منايام طفولتك او اى مرحلة من حياتك، ملحوظة؛ الشخص ده كان قرب من ال 50 ؟ )
أقسم بالله العظيم قالى : مافيش !!!!!😂😂
علماء النفس قالولنا ان العلاقات كلها عبارة عن مشاعر؛ أنا باحبك يعنى عندى مشاعر حلوة ناحيتك تفاهم، ود، تواصل ناجح، مساعدة لواحتجتنى وانا اقدر اساعدك، راحة… وحاجات حلوة شبه كدا. ❤️
ولو باكرهك ؛ هابغضك، مش هاساعدك؛ ممكن أؤذيك لو انا شخص مؤذى، مش هارتاح فى وجودك، هاهرب منك ….. وهكذا.
ده يا عينى مشاعره flat 😂
ولا بتطلع ولا بتنزل ولا بيحس بايجابية ولا بسلبية ولا بأنور وجدى، ولا يعرف يعنى ايه مشاعر أو أحاسيس أو الكلام الفاضى ده !
أنانى جدا؛ بشكل مش موجود فى انواع الشخصيات اللى نعرفها؛ لان ده مشكلته انه بيبقى انانى ومش (حاسس) انه انانى؛ ما هومبيحسش اصلا. 😂🙊
الشخص ده علشان منبقاش محتارين فى تصنيفه؛ ممكن نسميه مستنقع الشخصيات؛ لأنه جامع كل الاضطرابات الشخصية فى شخص.
شوية سيكوباتى على شوية سادى على شوية اعتمادى على شوية نرجسى على شوية هيستيرى، وهو مش حاسس إنه كدا.
هل ده له حل ؟
الاجابة : لاء؛ لأن الاحساس لا يتم تعلمه.
طب ايه الحل ؟
ده تركنه على جنب وتغطيه وتمشى كأنك مشوفتوش.
طب احنا بنتكلم عنه ليه ؟
علشان نعرف ان الشخص ده لما تشوفه فى أى مكان متعملش معاه أو علاقة من أى نوع؛ ولا صداقة ولا جواز ولا جيرة ولا حتى زمالة !
وراجع نفسك؛ إوعى تكون منهم. 😉❤️
