لو عايز تاخد أكتر من حقك أو تاخد حقوق الناس وتكسب فى كل الجولات حتى لو مش من حقك تكسب واللى قدامك هو اللى معاه الحق، صرخ وعلى صوتك فى كل المواقف، كل ما حد يقول حاجة هتحطك فى corner أو هتطلعك غلطان حتى لو فى حاجة صغيرة، حتى لو انت غلطان فعلا وانت عارف انك غلطان، اتخانق وزعق وصرخ بصوت عالى وخوف اللى قدامك، وعلى صوتك على الآخر، خليه يتخض ويسيب حقه.
إقلب الترابيزة وخد حقك وأقولك كمان، خد حقه وخد حقه حتى فى إنه يرد أو يتكلم، أصله لو اتكلم هيكسفك ويخلى شكلك وحش، فانت مافيش قدامك غير إنك تزعق، زعق جامد، جامد أوى، بوظ الموقف وحسسه إنه غلطان، وهو فى الغالب هيتخض ويسكت وتبقى انت كدا الفظيع اللى محدش يقدر عليه.
هيبقى شكلك حيوانى شوية وصوتك عالى على طول، مش مشكلة، الناس اللى هتصرخ فى وشهم هيكرهوك ويغيروا معاملتهم معاك، مش مشكلة، المهم تفضل إنت الملك وتعمل كل اللى انت عايزه وبالشكل اللى على مزاجك وبالطريقة اللى تريحك طول الوقت ولا تبالى بأى حد أو أى حاجة، أى كلمة فيها إشارة حتى من بعيد إنك غلطان، شغل إسطوانة الصريخ والصوت العالى فى لمح البصر، لاحسن الموضوع يفلت منك وتدخل فى دايرة إنك غلطان وبعدين تعترف بغلطك وتبقى المفروض تصلحه أو تعتذر، لا لا لا لا إنت مالكش دعوة بتهذيب نفسك وإصلاح أخطائك والكلام ده، إنت تخليك مستعد دايما زى ما اتفقنا، واقف جنب الترابيزة وساند عليها علشان مع أول فرصة تقلبها على أى حد فى أى وقت، ما الدنيا مش سايبة، ومتنساش فى نفس الوقت وانت بتقلبها تزعق، زعق أوى، زعق جامد، جامد أوى!
لازم تفهمهم كلهم إنك مبتغلطش ولو غلطت فانت مبتعتذرش ولا بتصلح من نفسك، لازم تفهمهم إنك كدا وعيوبك مريحاك ومش هتغيرها، خليهم هما يتغيروا أو يطفشوا أو يتشلوا، مش مشكلتنا دلوقتى، المهم إنت أخطائك وأى عكّ تعمله يستمر دون أدنى تغيير، خلى الموضوع ده هدفك فى الحياة، حتى لو حد سألك على أهدافك فى الحياة وهواياتك؛ قوله هدفى أقلب الترابيزات وهوايتى أزعق لما أبقى غلطان.
وكل يوم الصبح أول ما تصحى قول ( الزعيق والصريخ هو الحل ) 16 مرة وقبل ما تنام تقول ( بكرة يوم جديد من قلب الترابيزات ) 12 مرة، كدا هتبقى كويس جدا وضامن برمجة عقلك الصح اللى هتساعدك فى كل المواقف وتلاقى نفسك فى أى موقف بتصرخ وتزعق وحتى بتقلب الترابيزات كمان دون أدنى مجهود، ما انت اتبرمجت بقى والموضوع بقى أوتوماتيكى، هتحس إنك همجى أو كدا، لا متخافش دى وساوس شيطانية متركزش فيها، خليك فى هدفك الأسمى.
نراجع مع بعض؛ أى حد يزنقك فى موقف وتلاقى نفسك شكلك كدا غلطان ولا حاجة، أول حاجة تقلب وشك وتكشر، تانى حاجة تطلعه هو غلطان، تالت حاجة مش هاقولك على الزعيق بقى، زعيق زعيق زعيق على قد ما تقدر.
إوعى تفتكر الموضوع صعب أو كدا، لا ده أسهل مما تتخيل، وكمان التكرار بيعلم زى ما انت عارف، وانت بالتكرار هتتعود ويبقى الموضوع أسهل بكتير من إنك تشتغل على نفسك والكلام الفاضى ده.
يلا، ربنا يوفقك !
